Volta á rutina no Vero Boquete

  • Tras pasar na Copa Federación, o Compos quere manter a súa fortaleza na casa ante o Polvorín

Santiago de Compostela, a 4 de Outubro de 2019.

A SD Compostela volve este domingo á rutina no Vero Boquete. Despois de eliminar ao Arandina nos dezaseisavos da Copa Federación, os nosos xa se centran no seu novo reto, o duelo ante o Polvorín, nesta semana de Champions. Coa intención de manter a fortaleza do fortín, os branquiazuis queren lograr os tres puntos para seguir na parte alta.

Coa moral alta, despois dun gran comezo do campionato ligueiro, e as boas sensacións mostradas no encontro de onte, os santiagueses saben que non se poderán relaxar ante un rival, filial do Lugo, que tamén aposta polo fútbol de toque.

“É un equipo superdinámico, que tenta xogar desde atrás, con xogadores verticais, con bo pé e moita calidade, que apostan polo xogo combinativo, sen medo a nada”, analizou Yago Iglesias na rolda de prensa previa.

Precisamente, o corpo técnico destaca as cualidades do seu plantel, na que moitos deles xa estiveron ás ordes de Manuel Jiménez. “Ao ser un filial dun equipo profesional, varios dos seus futbolistas xa adestran co primeiro equipo, polo que teñen ese ritmo de competición, e algún mesmo xa debutou”, manifestou.

Por este motivo, agardan un encontro equilibrado, no que os nosos terán que mostrar a súa mellor cara, igual ou superior á de ata agora. “Será moi complicado, pero temos que analizar ben ao rival e recuperar ben as pernas. Xa adiantamos traballo durante a semana e a idea é que cheguemos frescos de pernas para ser de novo o Compostela de San Lázaro”, explicou.

Con esa premisa, Yago adoptou o duelo de copa como unha boa proba de lume para o que teñen por diante. “Sen dúbida, foi unha boa preparación para o domingo, xa que presionaban con cinco xogadores arriba. O escenario da primeira parte foi moi bo para tomar nota e seguir crecendo”, comentou.

Por todo iso, espera que o calor da afección se note máis que nunca, achegando ese ánimo extra necesario para que o choque saia adiante. Seguindo fieis ao seu estilo de xogo, o Compos quere agradar de novo á parroquia branquiazul, mantendo a súa posición de privilexio na táboa.

Con todos os xogadores dispoñibles, os dezaseis que sexan da partida tentarán, por tódolos modos, manter a maxia do seu fortín, unha unión que, como xa se notou, faise vital para loitar por todo nesta tempada.

Compartir en Redes Sociales

Relacionado