[cs_video column_size=”1/1″ video_url=”https://youtu.be/hRHvvKOfKVg” video_width=”500″ video_height=”250″][/cs_video]
-
O Compos regresa ao campo onde conseguiu a liga para medirse a un Arenteiro que estrea adestrador
Santiago de Compostela, a 23 de Novembro de 2018.
O pasado 6 de maio, no Espiñedo, a SD Compostela gozaba dunha das tardes máis felices da historia máis recente do club. O equipo branquiazul conseguía o título de liga, cunha xornada de adianto, tras superar ao CD Arenteiro por 0-1. Este domingo, algo máis de medio ano despois, os santiagueses regresan a un dos campos máis especiais do campionato para, noutras circunstancias, tentar repetir o triunfo do curso pasado.
Instalados en zona de playoff, con seis semanas sen coñecer a derrota, o Compos quere seguir ampliando a súa dinámica actual, malia que para iso terá que superar a un conxunto local que estrea técnico, o santiagués Rogelio Gómez ‘Gelucho’.
“É unha semana atípica, porque temos información do adestrador anterior, co que mantiñan a liña continuísta de cursos pasados. É certo que tamén coñecemos ao adestrador novo, sabemos a súa idea de ver o fútbol, con equipos moi competitivos, pero en só dous días seralle complicado preparalas”, explicou Yago Iglesias na rolda de prensa, quen coincidiu con Gelucho nas categorías inferiores do Santiago.
Este motivo preocupa a un adestrador branquiazul que agarda a un Compos adaptable, que manexe varios rexistros. “Ao non saber o que exporá o rival, debemos moldearnos ao que propoña e, no que especialmente insistimos esta semana, foi o terreo de xogo, xa que se na primavera non estaba en bo estado, nesta datas estará peor”, analizou.
Outro aspecto para ter en conta será a calor do público que encherá a bancada, unha afección moi fiel á que Yago agradece o trato recibido durante a pasada campaña e que dará moitos ánimos aos seus. “Como sempre, cando vai o Compostela e máis despois de gañar a liga alí, será unha motivación extra para eles, ao que haberá que sumar a fame duns xogadores que quererán demostrarlle ao técnico que poden ser titulares”, remarca.
A maiores, hai que sumar a calidade dun plantel local que se reforzou “con non bos, senón grandes fichaxes” este verán. “Trouxeron xogadores con moita experiencia na categoría e superiores, polo que forman un plantel que pode facer dano en distintas situacións, xente rápida arriba, forte a balón parado e que nolo poñerá moi difícil”, valora o adestrador ribeirense.
Con todo, o corpo técnico confía no seu equipo, nun encontro no que non estarán nin Marcos Remeseiro nin Josiño e que, por iso, se aveciñan cambios. “Somos fieis crentes de rotar, en que todo o mundo teña minutos e demostre, xa que ese é a clave do éxito a medio-longo prazo”, advertiu.
Os dezaseis que viaxen, nesta saída especial para moitos deles, buscará unha nova vitoria para manter a posición privilexiada na táboa. “É un tempada e xornada distinta e, seguramente, teñamos que facer cousas diferentes para levarnos os tres puntos”, concluíu Yago.
A clave o domingo pasará por adaptarse ao Arenteiro e ao campo do Espiñedo, nunha saída na que o equipo espera contar cun gran apoio na bancada, debido ao motivo especial que a rodea. Enfrontándose ao que veña por diante, o Compos espera volver o domingo igual que a tempada pasada, cos tres puntos debaixo do brazo para ampliar a dinámica das últimas semanas.
