SD Compostela e CD Conxo Santiago camiñarán xuntos dende a próxima tempada

  • Ambos clubs chegaron a un acordo para que o Compos leve a xestión deportiva e económico-administrativa da histórica entidade
  • O 1 de xullo entrará unha nova directiva que desenvolverá o convenio

Santiago de Compostela, 20 de abril de 2022

A SD Compostela e o CD Conxo camiñarán, dende o próximo 1 de xullo, xuntos da man. Ambos clubs chegaron a un acordo para que o Compos leve a xestión deportiva e económico-administrativa da histórica entidade compostelá, un convenio negociado nas últimas semanas e que conta co visto e prace da que será a nova directiva, que tomará o relevo da actual xunta xestora. O acordo foi negociado polo presidente da xunta xestora do CD Conxo Santiago e o seu actual coordinador deportivo, e polo director deportivo e o coordinador de fútbol base por parte do club branquiazul.

En base a ese acordo, ambos clubs seguirán competindo de maneira independente, aínda que sempre cunha vinculación estreita que permitirá a creación dunha gran estrutura de fútbol base na comarca de Santiago, converténdoa nunha das tres primeiras de Galicia, para fomentar o ascenso dos xogadores de ambas entidades ao primeiro plantel da SD Compostela.

Deste xeito, a que será a nova xunta directiva do CD Conxo Santiago xorde da súa proximidade coa directiva branquiazul, a cal será vital para alcanzar os seus obxectivos sociais e deportivos, a través da capacidade de xestión económica, técnica e de recursos humanos de que dispón a entidade compostelanista.

Neste sentido, será a Fundación Sociedade Deportiva Compostela, declarada fundación de interese galego e de interese deportivo pola Xunta de Galicia, a responsable da devandita xestión, tentando manter a actual estrutura do Conxo Santiago. Dado que un dos obxectivos básicos da citada Fundación é o fomento da práctica deportiva nos máis novos, este acordo poñerá aínda máis en valor o seu traballo.

Con todo iso en mente, Miguel Calviño González será o presidente do CD Conxo a partir do 1 de xullo, acompañándoo na dirección da entidade Manuel Ángel Antelo Liste, José Ramón Vives Campos, Amadeo Rey Couceiro e Mateo García Morais.

O acordo, que terá vigor para as próximas catro tempadas, asinarase en próximas datas.

Compartir en Redes Sociales

Relacionado