Santi Gegunde causará baixa a próxima tempada

Marcha-Santi-Twitter

  • O club agradécelle ao lucense o seu compromiso e rendemento nestes tres anos

Santiago de Compostela, a 26 de Xuño de 2019.

Santi Fernández Gegunde causará baixa a próxima tempada na SD Compostela ao non ofrecerlle o club a renovación. A directiva agradécelle enormemente o seu compromiso e rendemento futbolístico nestas tres campañas connosco, nas que se destacou como unha das pezas máis utilizadas polo técnico Yago Iglesias.

Santi chegou ao Compos no verán do 2016 para asentarse como unha referencia no ataque do novo proxecto compostelanista. O lucense mostrou rapidamente as súas capacidades goleadoras, pero tamén unha enorme visión e control do xogo, o que o levou a alternar o posto de dianteiro centro con outros na segunda liña.

Neste tempo, o punta disputou 115 encontros coa elástica branquiazul, celebrando 30 goles neles, a maiores de sumar algunhas asistencias. O seu último tanto foi no encontro contra o Alavés B, no que mesmo lesionado xerou a xogada do terceiro, un claro exemplo do seu compromiso por esta entidade.

Ademais, neste último curso tamén adestrou aos prebenxamíns, traballo como técnico no que transmitiu os bos valores que tentamos inculcar nos pequenos e pequenas.

Por todo iso, o club agradécelle todo o seu labor, tanto no persoal como no futbolístico, á vez que lle desexa a maior das sortes para o seu futuro. Moitas grazas, Santi.

Compartir en Redes Sociales

Relacionado