Samu cumprirá a súa sétima tempada na SD Compostela

  • O mediocentro de Bembibre e segundo capitán do equipo renovou o seu compromiso co club por unha campaña máis

Santiago de Compostela, 3 de xullo de 2022

Samu Rodríguez cumprirá a súa sétima tempada na SD Compostela, despois de renovar o seu contrato por unha campaña máis. O mediocentro de Bembibre (Val do Dubra), segundo capitán do equipo, seguirá liderando ao Compos, dentro e fóra do campo, na Segunda RFEF.

Deste xeito, Samu convértese no actual xogador con máis campañas seguidas no club, ao que chegou desde o Noia no verán do 2016. En todo este tempo, o mariscal branquiazul demostrou a súa gran calidade, enorme visión de xogo, intelixencia táctica e tamén un bo golpeo de balón desde longa distancia e a balón parado.

Ata a data, o capitán acumula xa 152 partidos xogados coa camiseta compostelanista, vinte e sete deles no último curso, quince como titular, nos que anotou tres goles (contra o Pontevedra, Arousa e Ceares) e repartiu varias asistencias.

Ademais, na súa traxectoria no club, Samu logrou un ascenso á Segunda División B, dúas ligas de Terceira División, unha Copa Deputación e unha Fase Autonómica da Copa RFEF.

Coa súa renovación, a SD Compostela 22/23, con Fabiano como adestrador, conta con trece xogadores con contrato: Pato Guillén, Borja Rey, Roque, Álvaro Casas, Pablo Crespo, Damián Canedo, Martín Salvador, Pablo Antas, Samu, Fer Beltrán, Jordan, Parapar e Pablo Durán.

Compartir en Redes Sociales

Relacionado