Recuperar o sorriso

Santiago de Compostela, a 12 de Novembro de 2016.

Tras tres xornadas sen gañar, o Compos buscará este domingo ante o Órdenes SD recuperar o sorriso que producen os triunfos. A pesar de que a imaxe do equipo mellorou nas últimas semanas, por distintas razóns, o equipo só sumou un punto en Vilagarcía, polo que sumar de novo de tres é importante.

Por iso, Yago Iglesias en sala de prensa, recoñeceu que “a pesar de que non se conseguiu gañar, a imaxe mostrada da esperanzas de que se están facendo as cousas ben e de que a vitoria chegará pronto”. Este triunfo agarda que se logre esta fin de semana xa que “faría bo ou moi bo, o empate da semana pasada contra o Arousa, un rival que estará arriba todo o ano”.

Con esta mentalidade, o Compos enfrontarase ao Órdenes, pechacancelas da Terceira División con 5 puntos, que comezou moi mal o curso, pero que mellorou nas últimas semanas, nas que conseguiu a vitoria e os dous empates que sumaron ao seu marcador. Este é un dato que teñen moi en conta tanto xogadores como corpo técnico, e así o reflicte Yago: “Espero un equipo que para nada é o que a clasificación di. Está conformado con xente nova, con moitas ganas de darse a coñecer e realizou grandes partidos nas últimas xornadas, sorprendendo a equipos como o Alondras”.

Por tanto, a pesar do que poida dicir a clasificación, Yago non quere relaxacións, xa que “sabemos o que nos xogamos”. Para o técnico, é fundamental que “os tres puntos queden en San Lázaro”.

Para que isto sexa así, o obxectivo é “seguir na liña das últimas xornadas”. Ser un equipo que busca dominar co balón e que “en casa fai moitos goles”. Nel non estarán Samu, por lesión, a nova fichaxe Recoba, porque aínda non chegaron os papeis, e Tomás, por acumulación de cartóns.

Os once que saian ao campo tentarán agradecer á afección o agarimo mostrado no que vai de campionato. Yago ten claro que “que a xente de Santiago nos acompañe, que veña a animar a este grupo de xogadores sexa cal for o tempo, é moi importante”, polo que están “contentísimos con eles”. Que esa alegría se reproduza polos resultados logrados, é agora a meta.

Compartir en Redes Sociales

Relacionado