Queiruga: “Se facemos o noso creo que nos irá ben”

O acto tivo lugar na Bodeguilla de San Lázaro, empresa que segue apoiando ao club.

O acto tivo lugar na Bodeguilla de San Lázaro, empresa que segue apoiando ao club.

  • O central analizou o encontro de mañá contra a Arandina, no que espera volver contar coa confianza do adestrador

Santiago de Compostela, a 2 de Outubro de 2019.

Cambio de chip. A SD Compostela deixa ao carón, minimamente, a competición ligueira para centrarse na Copa Federación, competición na que disputará mañá, ás 20.00 horas, os dezaseisavos de final contra a Arandina, nun choque que se xogará no Vero Boquete de San Lázaro. Xa inmerso na fase nacional, os nosos queren ir pasando roldas para facer posible o soño de disputar o torneo do KO.

“Cada partido xogámolo para gañar e tentar clasificarse para a Copa do Rei é algo que esta aí e que nos gustaría”, explicou Jorge Queiruga na rolda de prensa previa realizada nas instalacións da Bodeguilla de San Lázaro, local que segue apoiando ao club unha tempada máis.

O central, que regresou á entidade branquiazul este verán, tras un curso cedido no Puebla, afronta esta cita con ilusión, coa esperanza de volver contar cunha nova opción no once. “Obviamente, se podo xogar todas as semanas, perfecto, pero son sénior de primeiro ano e o que me toca esta tempada é ir entrando aos poucos e aproveitar as oportunidades. Non teño présa, tócame ir con paciencia”, aclarou ante os medios.

Tralo seu “Erasmus” no Barbanza, séntese agradecido de formar parte dun plantel no que mellora cada día. “Nos adestramentos apréndese unha barbaridade. Casas e Soto, que son máis veteranos, tiran moito dun, por exemplo, coa colación no campo e iso a min axúdame moito”, comentou.

Esa “dureza defensiva” cre que foi vital para asinar este arrinque, con cinco vitorias e só unha derrota. “Coas fichaxes, sen perder calidade, gañouse moito no outro fútbol, con xente de oficio que manexa moi ben eses momentos concretos dos encontros”, destacou.

Por iso, ten clara cal é a premisa a seguir. “O nivel defensivo ata o de agora é case perfecto, difícil de mellorar, polo que no partido de mañá seguiremos apostando pola portería a cero”, remarcou.

Esa confianza, que non relaxación, está a beneficiarlles neste inicio de competición, algo que esperan trasladar a esta eliminatoria. “Xogamos na casa, un campo que nos beneficia moito para o noso estilo de xogo, polo que se facemos o noso creo que nos irá ben”, sentenciou.

Nel, e tras acabar de estudar ao rival esta tarde, agarda que se siga collendo rodaxe para o futuro. “Estes encontros entre semana véñennos ben para probar certos aspectos para a liga”, concluíu.

As premisas están claras, agora só falta que chegue a hora e comece a rodar o balón. Queiruga ten ganas xa de debutar ante o seu público e, xunto aos seus compañeiros, espera darlle unha nova alegría aos afeccionados. Co mono de traballo, os nosos tentarán pasar á seguinte rolda.

Compartir en Redes Sociales

Relacionado