Pato volve a Segunda B co Compos

  • O porteiro uruguaio, tras lograr o obxectivo, renovou por dúas tempadas

Santiago de Compostela, a 3 de Agosto de 2020.

Hai un ano, Patricio Guillén chegou á SD Compostela coa intención de devolver ao equipo á Segunda División B. Un ano despois, e co obxectivo logrado, o porteiro uruguaio renovou o seu compromiso coa entidade branquiazul por dúas tempadas. O club asegúrase así a continuidade dun gardameta cunha dilatada experiencia na división de bronce do fútbol nacional.

Con 129 partidos ás súas costas en Segunda B, Pato sacouse a espiña que tiña cravada co Compos, polo que non dubidou á hora de asinar a ampliación do seu contrato. Será o seu sétimo ano na terceira competición española e o seu segundo coa escuadra compostelanista nela.

Nesta segunda etapa no club, do mesmo xeito que na primeira, o arqueiro demostrou a súa gran axilidade e calidade baixo os paus, sendo peza chave para o equipo. Así, disputou os vinte e sete encontros de Liga e os dous do playoff de ascenso ao completo. Do mesmo xeito, nesta campaña, logrou un récord histórico do club, o de máis minutos sen encaixar un gol. A marca que pasou á historia da entidade quedou nos 798 minutos.

Coa súa continuidade, o Compos pecha a portería para a tempada do seu regreso á Segunda División B, debido a que Pato pelexará por un posto no once con Borja Rey, única fichaxe ata a data. Aos dous, súmanse tamén Álvaro Casas, Samu e Brais Abelenda, polo que xa son cinco os xogadores confirmados para o curso próximo.

Compartir en Redes Sociales

Relacionado