- Sumou un novo triunfo como visitantes por 0-1, do mesmo xeito que o Filial
Santiago de Compostela, a 16 de Decembro de 2019.
Seguen pasando as xornadas e o Xuvenil A segue asentado no máis alto da clasificación. Os branquiazuis, en pleno refacho, volveron sumar de tres, nunha saída complicada, e manteñen a súa renda de oito puntos co segundo. Tamén sumaron de tres nesta fin de semana chuviosa o filial, Infantil A, Benxamín A e os dous Biberóns. Mentres tanto, houbo outros tres empates e tres encontros suspendéronse polo mal tempo.
En primeiro lugar, o SD Compostela-Zona Vella regresou á boa senda, logo de varias derrotas consecutivas, para volver sumar de tres como visitantes. O filial dirixido por Fiz Rodríguez superou por 0-1 ao Trazo grazas ao solitario tanto de Yago Brea, no 26, un resultado co que avanzan na táboa.
Cun idéntico 0-1, o Xuvenil A cultivou a súa cuarta vitoria consecutiva, outra lonxe de Santiago, coa que mantén o seu gran dinámica e a súa vantaxe na clasificación, de oito puntos sobre o seu inmediato perseguidor. A pesar das cuantiosas baixas que ten por lesións, os canteiráns están a sobrepoñerse con mestría e levaron o gato ao auga grazas ao tanto de Alberto Pampín no último minuto do primeiro acto. Por contra, non tivo tanta sorte o Xuvenil B, que caeu por 2-3 contra o Arzúa, a pesar das dianas de Hugo Martínez e Rubén Gesto.
Non tivo a mesma sorte esta vez o Cadete A que, aínda que volveu mostrar a súa solidez defensiva, non puido sumar de tres. Os branquiazuis, na difícil visita ao Racing de Ferrol B, empataron 0-0. Tamén sumou un punto o Cadete B, que mantén a posición de privilexio na liga Autonómica, logo de quedar 1-1 contra o Atlético Fátima, rival polo ascenso. O único gol marcouno Joel Rolf Seoane desde o punto de penalti. E en terceiro lugar, o Cadete C perdeu por 1-4 ante o Calo, sendo Fabián Lamela o autor do tanto da honra.
En infantís, o Infantil A mostrou a súa mellor versión para superar ao AD Manuel Peleteiro por 2-6 e seguir na cuarta posición da clasificación. O hat trick de Leo González e os tantos de Álvaro Espasandín, Anxo Olveira e Lucas Dagnac sentenciaron o choque. Igualmente, marcha cuarto o Infantil B, que empatou contra o Victoria, terceiro, 1-1. Daniel Ouro foi o goleador branquiazul.
En fútbol-8, o Alevín A non foi capaz de superar ao Conxo, contra o que caeu por 2-5. Alevín C, Benxamín B e Prebenxamín A viron suspendidos os seus encontros polo mal tempo, xa que os tres xogaban no mesmo campo e á primeira hora da tarde do sábado, cando aumentou un vendaval.
Se puideron xogar o Benxamín A, que segue terceiro ao superar ao Villestro, e o Prebenxamín B, que perdeu na súa visita ao Tordoia.
Por último, en fútbol sala, o Biberón A gañou por 0-4 ao Praíña, mentres que o Biberón B superou por 3-0 ao La Salle.
