O Compos ultima a redacción do seu protocolo de seguridade para poder abrir as portas do Vero Boquete

  • A empresa contratada polo club traballa contrarreloxo para presentar a solicitude nos próximos días
  • Os continuos cambios na normativa retardan a súa redacción

Santiago de Compostela, a 6 de Outubro de 2020.

A SD Compostela ultima a redacción do protocolo de seguridade que posibilitaría a presenza de público nos seus partidos como local, que disputará no Estadio Verónica Boquete de San Lázaro. A empresa encargada da redacción do mesmo xa fixo chegar un borrador e, a falta dos últimos retoques, espera telo listo esta mesma semana.

O club confía en que as autoridades dean o visto e prace ao devandito protocolo e permitan o acceso dos afeccionados ao Vero Boquete. O mesmo segue ao pé da letra toda a normativa e fai primar a seguridade por encima de calquera outro interese. Estímase que o aforo podería oscilar entre 1900 e 2500 espectadores, atendendo ao número de convivintes que accedan ao estadio.

Por iso, desde o Compos tense claro que serán os abonados os que teñan prioridade en todos os partidos que se poidan disputar con público, e só se poñerán localidades á venda se o aforo supera o número de abonados. Por outra banda, tampouco se descarta desde o club que nalgún partido sexa necesario desviar abonados dunha bancada a outra, á espera de coñecer o aforo.

O que se se coñecen son xa os primeiros detalles do protocolo, que serán de obrigado cumprimento, salvo que se produzan novos cambios na normativa, os cales están a retardar a redacción. Todos os asistentes aos partidos da SD Compostela pasarán un control de temperatura na porta de acceso ao Estadio, deberán usar xel hidroalcohólico antes de acceder á bancada, deberán presentar o seu DNI para acceder e deberán presentar unha declaración responsable de non ter síntomas nin estar en contacto nos últimos quince días con persoas con covid-19 (a declaración inclúe os seus datos persoais e teléfono). O modelo de declaración responsable poderase obter nas oficinas do club ou na web, e a súa presentación será sempre obrigatoria.

Por último, desde o club valorarase, cando se coñeza a redacción definitiva do protocolo, suspender de forma definitiva a campaña de abonados para evitar problemas co aforo das diferentes bancadas.

Compartir en Redes Sociales

Relacionado