-
O gol de Yelco decidiu un encontro no que o Compos careceu de fortuna
Santiago de Compostela, a 16 de setembro de 2019.
O clásico do grupo 1 da Terceira División, disputado onte no campo das Eiroas, caeu ao lado do Bergantiños. O cadro de Carballo superou a un Compos, carente de fortuna cara ao arco rival, co solitario tanto de Yelco, no minuto 74. Certificouse así a primeira derrota da tempada para os nosos, apertándose a parte alta da táboa clasificatoria.
Tal e como indicou Samu na previa, o Bergan saltou ao seu feudo con moito ímpeto desde o inicio, situación ben prevista polos nosos e que souberon controlar a través do dominio do esférico. Con todo, froito da enorme calidade que atesouran ambos conxuntos, as ocasións dividíronse entre ambas áreas.
Por unha banda, Rivera tentouno cun disparo desde fóra da área despexado por Pato e con outro golpeo, na área pequena, que enviou ao traveseiro.
Polo outro, Miki puido abrir o marcador nunha das súas habituais entradas por banda, pero o seu disparo marchouse rozando o pau, mentres que Álvaro Casas, á saída dun córner, atopouse tamén coa madeira, despois de conectar un excelente cabezazo.
Con todo, non se moveu o marcador e a decisión da batalla quedou para a segunda metade. Nela, serían os locais de novo os primeiros en avisar, logo dun penalti de Pato sobre Yelco. O propio porteiro uruguaio volveu demostrar a fama que atesoura como “parapenaltis” para acertar coas intencións de Rivera, sacando a man para despexar o esférico a córner.
A acción espoleou aos nosos e Gabri Palmás, recentemente entrado ao campo, puido abrir o luminoso, pero a sorte volveu ser esquiva, xa que o seu disparo desde dentro da área rozouno Canedo e pegou no pau, antes de marcharse por liña de fondo.
E a situación empeorou cando Yelco, no 74, si foi capaz de enviar o esférico ao fondo da rede. Nun despexe desde o centro do campo, Rivera gañou o salto de cabeza e deixou a pelota morta na área para que o extremo, adiantándose ao seu par e ao meta coa súa diagonal, superase por baixo a Pato e marcase, ao cabo, o único gol do encontro.
Foi o tanto decisivo, porque outra vez, no desconto, a pelota marchouse rozando o pau, cando Pablo Antas conectou un soberbio cabezazo desde o punto de penalti. Non era o día e o partido languideceu para a alegría dos locais.
Con esta derrota, a primeira da tempada, o Compos mantense en postos de playoff, con nove puntos, malia que lle recortan a diferenza varios rivais. Así, toca levantar rapidamente a cabeza e buscar de novo o triunfo o vindeiro domingo ante un deles, o RC Deportivo Fabril, dirixido por Luisito.
FICHA TÉCNICA:
1- Bergantiños CF: Canedo; Bilal, Antonio, Marcos, Agulló Aarón; Duque (Diéguez, m.66), Diego, Marcos Remeseiro (Cano, m.75), Yelco (Granada, m.75); e Rubén Rivera.
0- SD Compostela: Pato; Soto, Samu, Casas; Miki, Baleato, Mon (Josiño, m.75), Pablo Antas, Brais Abelenda (Saro, m.82); e Rodri Alonso (Gabri Palmás, m.59).
Goles: 1-0: Yelco, min.74.
Árbitro: González Franco (Ferrol). Amoestou a Agulló, Diego e Antonio, polos locais; e a Miki, Pato e Jimmy, polos nosos.
Incidencias: Campo das Eiroas (Carballo). Partido da xornada 4 de liga do grupo 1 da Terceira División disputado ante 700 espectadores.
