Mario Rodríguez, novo reforzo para o ataque da SD Compostela

  • O atacante, con ampla experiencia en Segunda B, firma por unha tempada
  • Chega dende o Atlético Levante, onde disputou a segunda volta da pasada campaña

Santiago de Compostela, 27 de xullo de 2022

Mario Rodríguez Ruiz (Barcelona, 03/03/1997) é novo xogador da SD Compostela para a Tempada 22/23. O atacante barcelonés, con ampla experiencia na Segunda División B, chega desde o Atlético Levante, conxunto co que disputou a segunda volta do pasado curso, e firma por unha campaña.

Mario Rodríguez destaca por ser un xogador habilidoso e polivalente, que pode actuar tanto en ambos extremos como de mediapunta. Ademais, é un futbolista de enorme talento e calidade, cun gran último pase, características que chamaron a atención da dirección deportiva do club para afrontar a súa fichaxe. Do mesmo xeito, aválao a súa gran traxectoria futbolística, chegando a debutar mesmo en Primeira División co Granada.

Formado nas categorías inferiores do Real Madrid, xogando a UEFA Youth League e sendo convocado durante a súa etapa de formación pola Selección Española Sub16, comezou a súa carreira deportiva no Castilla, no seu último ano como xuvenil. Alternando o División de Honra co filial, disputou 15 partidos en Segunda B, cinco deles como titular.

Ao seu paso a sénior, marchouse cedido ao C.E. Sabadell, tamén en Segunda B, onde disputou vinte partidos, seis como titular. Tralo seu periplo en terras catalás, desvinculouse do Real Madrid e fichou polo C. F. Peralada, tamén do Grupo III de 2ªB, xogando 29 encontros, dezanove de inicio, e marcando dous goles.

Ese gran rendemento chamou a atención do Granada, que o recrutou para o seu filial, do Grupo IV da Segunda B. Na tempada disputou 27 partidos, vinte e catro como titular, anotando catro goles e repartindo varias asistencias, un nivel que tivo como premio o seu debut, o 1 de xullo de 2020, en Primeira División. Saltou ao campo nos últimos minutos do partido que gañou o Granada contra o Alavés, en Mendizorroza, selando a súa permanencia. Ademais, estivo gran parte do curso en dinámica do primeiro equipo, sendo convocado en dezaseis encontros, e disputando tamén ao completo a primeira rolda da Copa do Rey.

Tras o seu paso por terras andaluzas asinou no Warta Poznań da Primeira División de Polonia, conxunto no que estivo un ano e medio. No seu primeiro curso xogou catorce partidos, un de Copa, anotando un tanto, mentres que na primeira metade do pasado ano disputou dezaseis encontros. Con todo, no mercado invernal rescindiu o seu contrato e chegou ao filial do Levante UD, da Segunda RFEF, participando en oito partidos, todos como titular, e marcando dous goles.

En total, aos seus 25 anos, acumula 91 partidos en Segunda B, oito en Segunda RFEF e 29 na liga de Polonia, así como o seu citado debut na Primeira División e na Copa do Rey, cifras que seguirá incrementando na capital galega.

Coa súa chegada, a SD Compostela 22/23 conta con dezaseis xogadores do primeiro plantel con contrato: Pato Guillén, Borja Rey, Roque, Álvaro Casas, Pablo Crespo, Damián Canedo, Martín Salvador, Pablo Antas, Samu, Mario, Fer Beltrán, Jordan, Mario Rodríguez, Cano, Parapar e Pablo Durán. Trala súa firma, o atacante sumarase aos adestramentos o próximo luns.

Compartir en Redes Sociales

Relacionado