Gonzalo García ‘Recoba’ xa é xogador da SD Compostela

  • O xogador uruguaio, pero criado en Compostela, firma despois de estar a adestrar desde principio de tempada, aínda que aínda non ten o transfer para xogar.

Santiago de Compostela, a 11 de Novembro de 2016.

Un salto de calidade. A SD Compostela logrou un gran impulso ao seu novo proxecto coa chegada do seu vixésima terceira incorporación. Gonzalo García ‘Recoba’, xogador de 33 anos que o ano pasado militaba no Heracles Almelo da Eridivisie, regresa a casa para recuperar ritmo de competición e aproveitar, no club no que se formou, a oportunidade de poder reengancharse ao primeiro nivel do fútbol profesional.

O mediapunta, aínda que pode actuar noutras posicións do medio e da fronte de ataque, como así o recoñeceu na súa presentación, estaba a adestrar desde o principio do curso co equipo santiagués. Unha lesión no tramo final da tempada impediulle viaxar a unha nova aventura en EEUU, polo que pediu ao Compos para comezar a adestrar con eles.

Así, desde principio de tempada, o futbolista que militou en seis equipos da Eredivisie, ademais de pasar tamén por Israel, onde gañou a liga co Maccabi Tel-Aviv, e Chipre, comezou a entrar paulatinamente na dinámica do grupo ata que, ante a falta de propostas interesantes, decide asinar pola SD Compostela.

Deste xeito, ‘Recoba’ cumpre un soño, o de regresar a xogar coa SD, aínda que matiza que “quizais antes do esperado”. Con todo, “vista a situación, tamén sabía que se tiña que xogar en Galicia ía ser neste equipo porque é a miña casa e considero a Santiago como o meu fogar”.

Esta razón faille estar “un pouco nervioso porque terei a toda a miña familia detrás cando xogue… Sinceramente, é raro porque aínda que estou afeito a xogar en campos con trinta, corenta ou cincuenta mil afeccionados e sentir coma se o fixese nunha praza, porén, aquí están os teus amigos e todos esperan moito… En fin, vai ser un día especial”.

Ese momento terá que agardar outra semana máis, xa que aínda que “me atopo ben, polo menos nos adestramentos”, o transfer aínda non chegou desde Holanda.

Como novo xogador, “non sei o tempo que estarei no Compostela, pero é certo que tanto a miña familia como eu estamos moi cómodos e moi contentos en Santiago. Seguro que canto máis tempo pase, máis preguiza me dará marchar a outro club e a outra cidade”.

Durante o tempo que siga no club, ‘Recoba’ espera achegar “a experiencia que necesita o equipo” e confía en “axudar aos rapaces á hora de tomar decisións no campo”.

Está encantado de formar parte dun equipo ao que considera con “calidade, con xente nova, ofensivo e con moi bo adestrador. Os seus partidos son moi divertidos, cun xogo atractivo”, estilo que casa moi ben coa nova fichaxe santiaguesa.

Compartir en Redes Sociales

Relacionado