Despedida dunha lenda: Jimmy non seguirá na SD Compostela

  • O lateral esquerdo deixa o Compos tras doce tempadas e 351 encontros

Santiago de Compostela, 20 de xuño de 2022

Óscar Seoane Mella ‘Jimmy’ non continuará na SD Compostela a próxima tempada, despois de que o club decidise non realizarlle unha oferta de renovación. O Compos despídese así dunha das grandes figuras do seu pasado recente, un lateral santiagués que o deu todo polo equipo da súa vida durante doce tempadas e 351 encontros disputados.

Despois de tres etapas diferentes no club, Jimmy deixa a SD Compostela aos seus 34 anos como un dos xogadores con máis partidos disputados coa camiseta branquiazul de toda a historia. Referencia do club do seu corazón, no seu prolongado periplo como compostelanista, ademais de demostrar as súas grandes calidades futbolísticas, conseguiu tamén tres ascensos, o último deles na tempada do covid.

Ademais, o lateral esquerdo pechou a súa etapa como xogador do Compos tras unhas tres últimas campañas nas que compartiu adestramentos e partidos co seu irmán Saro, con ambos asentados na defensa dos nosos.

Por todo iso, a SD Compostela quere agradecer a Jimmy o seu enorme traballo, dedicación e esforzo durante a súa etapa como compostelanista, desexándolle o maior dos éxitos para os seus retos e proxectos de futuro.

Moitas grazas, Jimmy!

Compartir en Redes Sociales

Relacionado