Comeza unha tempada ilusionante en Segunda B

  • Yago Iglesias asegurou que as sensacións son moi boas e que o equipo está con moitas ganas de estrearse na nova categoría

Santiago de Compostela, a 16 de Outubro de 2020.

Comeza a tempada, chega o momento da verdade. Este domingo, no Campo Reina Sofía, ás 16.30 horas, a SD Compostela redebutará na Segunda División B logo dun periplo de catro anos pola Terceira División. Liderados por Yago Iglesias, o proxecto branquiazul vístese de bronce e farao cunha dura proba de toque, a visita ao Unionistas de Salamanca.

Pretempada. “Tivemos máis adestramentos que partidos, pero as sensacións son moi boas. O equipo está con moitas ganas, con moita ilusión e desexando estrearse nesta nova categoría que levamos tanto tempo perseguindo”, comentou Yago Iglesias en rolda de prensa.

Baixas. “Imos ter a baixa segura de Soto, que arrastra sanción, e despois hai varios xogadores que estiveron toda a semana entre algodóns, pero, en principio, todos están dispoñibles. Ademais, baixamos a carga esta semana para chegar máis frescos”, comentou o técnico.

Primeira xornada. “Tócanos unha das viaxes máis longas, contra un gran equipo e un campo sintético, un dos dous que hai neste subgrupo, e tócanos empezar alí, o cal sempre é unha modificación respecto ao que estamos afeitos”, explicou.

O rival. “Contan con dezasete caras novas e adestrador novo tamén, pero son un equipo asentado na categoría e con pretensión de acabar arriba. Trátase dun equipo moi poderoso fisicamente, que basea a súa fortaleza en chegar rápido a portería rival, xa sexa en xogo directo ou contraataque, e iso vainos a esixir estar moi concentrados durante os 90 minutos”, analizou.

Aythami e o plantel do Unionistas. “Sen dúbida, Aythami é un xogador de nivel na categoría, pero tamén a outra xente que o acompaña, entre eles, De la Nava ou Álex Rey, que coñecemos ben no grupo galego. Coñecemos ben o potencial do seu ataque, porque é xente de área e de gol”, remarcou.

Sensacións. “Vemos ao equipo moi ben. As sensacións nos dous últimos partidos foron moi boas e agora queremos referendalo na competición”, destacou.

Plan de partido. “Polo que puidemos ver, é un campo de artificial de última xeración, de boas dimensións. Ao ser un campo novo, ten moito caucho, pero fixemos o noso plan de partido e temos unha idea máis ou menos clara da composición de lugar”, descifrou.

Filosofía. “É un chanzo máis, o nivel aumenta, os equipos son doutra talla, hai máis ritmo… pero imos tentar facer o noso xogo. Aínda así, tamén teremos que tentar sacar beneficio doutros recursos, ter máis rexistros e ser máis competitivos”, sinalou.

O subgrupo. “Desde o meu punto de vista é o subgrupo máis difícil, con equipos case todos con pasado en ligas profesionais e con grandes Estadios. Por iso, neste primeiro formato é importantísimo o partido a partido, é de vital importancia cada punto e por iso, dentro da nosa filosofía de continuidade, cremos que nos pode dar beneficio”, sinalou o técnico.

Compartir en Redes Sociales

Relacionado