Álex Ares e Remeseiro non seguirán na SD Compostela

Marcha-Marcos-Remeseiro

  • O club agradécelles o seu rendemento e compromiso na súa etapa no club

Santiago de Compostela, a 3 de Xullo de 2019.

Álex Ares Piñeiro e Marcos Remeseiro Conde non seguirán a próxima campaña na SD Compostela ao non ofrecerlles o club a renovación. A entidade agradécelles enormemente o seu rendemento, traballo e compromiso na súa etapa como branquiazuis, na que se asentaron como puntais tanto dentro do campo como na dinámica do grupo.

Álex Ares, desde a súa chegada fai dous veráns procedente do Cerceda, foi un fixo nas aliñacións de Yago Iglesias. Alternando a mediapunta coa banda, o futbolista de Pontedeume disputou 81 encontros nestes dous cursos como branquiazul, superando os 3.000 minutos na súa primeira campaña e rozándoos na segunda. Ademais, neste tempo, consagrouse como un dos goleadores da entidade ao asinar 12 e 14 goles respectivamente.

Pola súa banda, Remeseiro chegou ao Compos hai doce meses desde o CD Boiro e na súa estrea como compostelanista superou os 2.500 minutos de xogo. En total, ás ordes do corpo técnico dirixido por Yago, participou en corenta partidos, trinta e catro deles como titular, entre a Liga, a Copa Deputación e a Copa do Rei, pechando o ano con tres tantos anotados.

Por todo iso, a entidade trasládalles o seu máis sincero agradecemento por todo o achegado, tanto no que respecta a a súa faceta sobre o verde como no trato persoal. Os seus labores e esforzos por esta camiseta foron innegables, polo que lles desexamos a maior das sortes para o seu futuro. Moitísimas grazas, Álex e Marcos.

Compartir en Redes Sociales

Relacionado