A SD realizará este xoves ás 12 a ofrenda ao Apóstolo

Santiago de Compostela, a 14 de Setembro de 2016.

Un ano máis, a SD Compostela realizará a ofrenda ao Apóstolo Santiago nunha cerimonia que terá lugar este xoves 15 de setembro ás 12:00 na Catedral de Santiago de Compostela, e á que asistirán todos os xogadores do primeiro plantel, o corpo técnico e a xunta directiva, ademais dos membros da canteira da entidade santiaguesa. A misa será oficiada polo bispo auxiliar de Santiago de Compostela, D. Jesús Fernández.

Anteriormente, todo o grupo reunirase nas escaleiras da praza de Praterías ás 11:45, para entrar á catedral pola devandita porta.

Xa na cerimonia, a metade da misa, o presidente da entidade santiaguesa, Antonio Quinteiro, fará a súa invocación ao bispo, coa consecuente resposta do monseñor Jesús Fernández. Ademais, o máximo mandatario do club entregaralle ao bispo a camiseta desta tempada, serigrafiada coa frase: “Ao patrón Santiago”.

A continuación, comezará o voo do botafumeiro e mentres, todos os membros da entidade compostelá asistentes á cerimonia pasarán a darlle o abrazo ao Apóstolo, ascendendo ao camarín do altar maior.

O acto terá unha duración aproximada dunha hora e á saída da mesma, na praza da Inmaculada, o presidente, Antonio Quinteiro, o adestrador, Yago Iglesias, e o capitán, Santi Taboada, falarán diante dos medios en nome da entidade.

Todos aqueles que queiran asistir ao acto están convidados. Sería unha honra contar con todos vós na misa ao noso patrón.

Compartir en Redes Sociales

Relacionado