A SD Compostela e a UD Bastavales únense cun convenio para a base

Ana Belén Bouzas e Pablo Gosende, presidenta e vicepresidente da UD Bastavales, con Antonio Quinteiro, na Sala de Trofeos da SD Compostela.
  • Ambos clubs colaborarán durante as dúas próximas tempadas

Santiago de Compostela, a 30 de Outubro de 2019.

A Sociedade Deportiva Compostela e a Unión Deportiva Bastavales asinaron estes días un acordo de colaboración para as categorías inferiores que se prolongará durante as dúas próximas tempadas, 2019-20 e 2020-21. Mediante esta vinculación, buscarase o impulso da actividade futbolística na comarca, ademais dun estímulo para os e as máis novos.

Coa firma de Antonio Quinteiro Canedo, presidente da entidade branquiazul, e de Ana Belén Bouzas Mato, dirixente do conxunto brionés, ambos comprométense a traballar conxuntamente, de forma activa, na formación dos xogadores, pero tamén dos técnicos que forman parte dos seus equipos.

Este acordo permitirá aos adestradores e futbolistas da base da UD Bastavales participar nos programas impulsados polo Compos, como a Escola de Formación, a Compostec, o Clínic de Adestradores ou os Campus, de Verán e de Inverno, coas mesmas vantaxes que os membros do club santiagués.

A maiores, ambos colaborarán na cesión de xogadores para tentar axudarse mutuamente e, por último, os adestradores do Bastavales poderán asistir gratuitamente aos encontros de liga que se disputen no Estadio Verónica Boquete de San Lázaro.

Con este novo acordo, o proxecto de canteira da SD Compostela, coordinado por Víctor Pazos, segue crecendo e sumando pezas, xa que este pacto únese aos xa asinados anteriormente co Praíña SPC, Victoria FC e Milladoiro SD.

Compartir en Redes Sociales

Relacionado