Róber e Primo non continúan na SD Compostela

Óscar-Primo-Marcha Róber-Fernández-Marcha

  • Os dous últimos xogadores que faltaban por contestar deixan o club tras realizar unha gran tempada

Santiago de Compostela, a 11 de Xullo de 2018.

O extremo Róber Fernández Martínez e o dianteiro Óscar Conde Cruz, Primo, non continuarán o próximo ano na SD Compostela. Os dous últimos xogadores que faltaban por contestar á proposta de renovación do club, decidiron emprender novos camiños, tras realizar unha gran tempada no seu debut como branquiazuis, por diferentes motivos.

A entidade quere agradecerlles aos dous o servizo prestado neste ano, no que foron pezas fundamentais para un equipo que conseguiu alcanzar o título de liga na Terceira División e que quedou a un paso de lograr o salto de categoría. Ademais, queremos desexarlles a maior das sortes nas súas novas aventuras futbolísticas e estamos convencidos de que mostrarán a calidade que atesouran, do mesmo xeito que o fixeron no noso equipo.

Deste xeito, o proxecto non contará con dous futbolistas que tiveron un gran protagonismo no once de Yago Iglesias, a pesar de chegar recentemente fichados o verán pasado.

Óscar Conde Primo chegou procedente do CD Vitoria coa tarefa de ser o dianteiro referencia do equipo e así o logrou desde a primeira xornada. O punta foi un dos xogadores máis utilizados por Yago ao longo do ano e o pichichi do equipo. Pechou a tempada con 38 partidos xogados, todos menos dous de titular, e 23 tantos, tres deles logrados nun playoff no que quedou coa espiña cravada de non repetir o ascenso do curso anterior. Con todo, quedará gravado no recordo dos afeccionados o dobrete logrado na histórica remontada contra o Terrassa.

Pola súa banda, Róber fichou polo Compos tras unha gran tempada no CD Choco. O porriñés pese a vivir a súa primeira experiencia lonxe da súa casa, asentouse como un futbolista chave nos esquemas branquiazuis. En liga participou en 35 partidos, nos que se saíu de inicio en 32, mentres que no playoff, no que unha inoportuna lesión minguoulle fisicamente, xogou catro encontros, tres de inicio. Acabou o curso con oito goles, entre eles, o tanto que lle deu o título de liga aos nosos no campo do Arenteiro.

Compartir en Redes Sociales

Relacionado