O Compos non pode co Arousa

Aythami encontra ao porteiro no seu disparo. Foto: Amadeo Rey.

Aythami encontra ao porteiro no seu disparo. Foto: Amadeo Rey.

  • Nun minuto, pasouse dun gol anulado a Aythami ao penalti a favor dos locais

Santiago de Compostela, a 3 de marzo de 2019.

A SD Compostela quedou sen premio na Lomba. As inclemencias climatolóxicas, a fortuna e a defensa numantina local evitaron que os nosos perforasen a portería de Manu Táboas, unha sorte que se tivo o Arousa desde o once metros. Por iso, o tres puntos quedaron en Vilagarcía.

Tras un partido moi igualado, o encontro entre estes dous históricos da Terceira División decidiuse nun minuto. No 73, o árbitro anulou o gol de Aythami, e no 74 decretou como penalti a caída de Trapero na área. Pena máxima que anotou Sylla, pichichi da categoría.

Comezou mellor na Lomba o Arousa. Javi Otero foi o primeiro en probar fortuna, cun disparo desde fóra da área que despexou cos puños Anxo Pérez. Seis minutos máis tarde, o porteiro branquiazul volveu aparecer para sacar baixo a liña o cabezazo de Pablo González. O remate do central desde a área pequena foi sacado dunha maneira felina pola meta e a súa rexeite, que caeu nas botas de Trapero, foi enviado por este á parte exterior do pau.

A pesar desa saída, o Compos foise facendo co dominio do encontro a medida que pasaban os minutos. Afíxose ao campo e ao tempo e comezou a merodear pola área de Manu Táboas. Nunha desas xogadas de ataque, Brais Abelenda encaraba ao porteiro sen oposición, pero Javi Otero trabouno por detrás na frontal. Vermella directa e a falta, executada por Aythami, marchouse lambendo a madeira da portaría local.

Os branquiazuis tentábano coa posesión, mentres o Arousa acazapábase en busca dun contraataque. Aínda que antes do intermedio esa inferioridade non se frutificou con ocasións claras, á volta do mesmo a situación cambiou por completo.

Primeiro, Mon probou fortuna desde a frontal, pero atrapou Manu Táboas. Despois, un despexe do porteiro a centro de Brais Abelenda, foi rematado de cabeza por Santi, pero un defensa sacouno na liña. E para terminar, outro centro chute do dianteiro lucense foise ao traveseiro cando xa se presaxiaba o gol.

Esa diana chegou, no 72, pero o colexiado anulouno por fóra de xogo. Aythami recibiu a asistencia de Santi, a instancias do linier, en posición ilegal, polo que o tanto do canario non subiu ao marcador.

E mentres tanto, un minuto máis tarde, o colexiado decidiu sinalar o punto do once metros cando Trapero caeu na área. O central foise ao chan nunha xogada un tanto polémica, pero o árbitro non o dubidou e Sylla, pichichi da categoría, non fallou desde a pena máxima.

De aí ao final, o partido foi un querer e non poder. Os nosos tentárono de todas as maneiras posibles, pero non era o día. A máis clara, un man a man de Aythami contra Manu Táboas, volveuno a sacar o porteiro.

Así se acabaría o partido. O Compos tentouno todo, pero a pelota non acabou entrando. O tres puntos quedaron en Vilagarcía, polo que os branquiazuis perderon a imbatibilidade nesta segunda volta. A próximo semana, ante o Racing de Ferrol, tentaremos cambiar a fortuna no Tourmalet.

FICHA TÉCNICA:

1- Arosa SC: Manu Táboas; Pacheco, Trapero, Pablo González, Carlos Torrado; Iago Martínez Chiqui (Quique Cubas, m.82; Javi Otero, Luís García (Mou, m.76), Julio Rey (Suso, m.79); e Sylla.

0- SD Compostela: Anxo Pérez; Álvaro Casas, Piscu (Marcos Remeseiro, m.75), David Uña; Miki, Samu, Mon, Álex Ares, Brais Abelenda; Santi (Rubén, m.80) e Aythami.

Goles: 1-0: Sylla, min.74.

Árbitro: Castro Alarcón, colexio pontevedrés. Expulsou con vermella directa (m.28) a Javi Otero. Ademais, amoestou a Pablo González, polos locais; e a Aythami, Álvaro Casas, Brais Abelenda e Piscu, polos visitantes.

Incidencias: Partido da vixésimo sexta xornada de liga do grupo 1 da Terceira División disputado no Campo da Lomba ante 1.300 espectadores.

Compartir en Redes Sociales

Relacionado